أيتن عامر: شخصية رقية في “مكتوب عليا” هي وفاء عامر
أكدت الفنانة أيتن عامر أنها انزعجت من تصريح شقيقتها الفنانة وفاء عامر حول خيانة الزوج، والذي قالت فيه: “لو جوزي خانني يبقى العيب فيا”، موضحة أنها اختلفت مع شقيقتها بعد هذا التصريح، وأخبرتها أنه غير مناسب لأنه لا يوجد مبرر للخيانة.
أضافت أيتن خلال اللقاء الذي جمعها بشقيقتها “وفاء” في برنامج “معكم منى الشاذلي” على قناة cbc، أنها أخبرت شقيقتها أنه لا توجد أسباب للخيانة، ولا يمكن تبريرها سواء من الرجل أو المرأة، قائلة: “قلت لها مفيش أي سبب للخيانة أصلا.. في إن حضرتك تيجي تقولي إحنا مش قادرين نكمل مع بعض ولازم ننفصل وبعد كده اعمل اللي أنت عاوزه.. إنما خيانة لأ”.
أشارت إلى أنها عندما عرض عليها دور “رقية” في مسلسل “مكتوب عليا”، تخوفت من تقديمه في البداية لأنها لا ترى نفسها ممثلة كوميدية ولا تحب الشخصيات “المدلوقة في الحب”، قائلة: “لما اتعرض عليا مسلسل مكتوب عليا خوفت وقلقت إني هقدر أعمل الدور ده ولا لأ.. لأن أنا مش شايفة نفسي ممثلة كوميدية خالص، وأنا اصلا ضد إن الست تدلق في الحب أو في أي علاقة”.
تابعت ضاحكة: “تعبت بسبب تصرفات وفاء وإنها مدلوقة دايما.. وفاء دمرت لي مرارتي سنين وسنين.. وفاء بتقعد تحب في جوزها بطريقة صعبة.. شوفتي جلجل ورقية؟! شوفتي بتحبه ومدلوقة إزاي؟!.. أهي دي رقية.. والمصحف الشريف هي”.
