فريدة سيف النصر تتصدر تريند جوجل لهذا السبب

تصدرت الفنانة فريدة سيف النصر مؤشرات البحث على تريند موقع جوجل بعد منشورها الذي كتبته بالأمس بموقع الفيسبوك، معربة فيه عن استيائها من الهجوم الذي يطول الفنانين طوال الوقت، مشيرة إلى كونها حملات موجهة ضدهم.

تضمن منشور سيف النصر غضبًا من العبارات الجارحة التي تطول النجوم وتهاجمهم طوال الوقت وتسخر من أشكالهم وتقدمهم في السن، مطالبة أصحاب هذه الآراء بتقديم آرائهم النقدية بشكل لائق.

وجاء نص منشور سيف النصر كما يلي:

“أنا زعلانة علينا كلنا أوي..المصريين أحلى وأطيب وأجدع من كده بكتير..خفة دم وكرم وذوق..إيه اللي حصل..ليه بنستخبي ورا شاشات وننزل نحرا في رقاب بعض..الكلمة القاسية بتذبح..بقينا نكديين مانعرفش نفرق بين جد وهزار كله عايز يتخانق مع كله..إيه ده..وكل يوم يعاملوك بوش أو حسب المصلحة.

في إيه بعض الناس ماسكين الفنانين وكأن في تار بلا أسباب دي عجزت ودي كرمشت ودي غيرت دينها، وده دمه تقيل، وده كبر في السن لكن بيغني، وده بيرقص كونغرو، وده اتكسح ودي روحي موتي .كفايه عيب بتقولوا كده لأهاليكم ما كل العالم وانتم بعدين لازم تكبروا دي سنة الحياة..مالكم في ايه بجد..هما الناس دي  ما أسعدكمش أعمالهم فترات من الزمن..طيب بلاش انت مابتحبوش فلان غيرك بيحبه..في ايه ياجماعه تحسوا مخطط لهدم الفنانين القوي الناعمه اللي فاتحين بيوت 14مليونا. متخيلين.كل المهن شغاله معانا تحت أيديهم كام عامل واسطي كل واحد فيهم عنده أهل وزوجه وأطفال وفي اللي جوز ولاده وعندهم بيوت مفتوحه..بتحاربوا تمن عدد البلد في أكل عيشهم.

أقرءوا كده المسلسل بيتكتب ناس قد إيه عمالة في كل المجالات من أول مؤلف لحد السواقين في العمل مسلسل واحد ممكن يشغل خمسة آلاف حد مش هزار.  شوفوا الأسماء وقولولي..كفاية هدد في الفن..الوحش انقدوه بأدب والكويس شجعوه..إنما تسهتزءوا بفنانين كبار ليه يعني ..علي فكرة أنا عارفة أنها لجان مستهدفة الفن المصري..والفن عموما ماهو العربي بيصب هنا .هاه قررتوا إيه ..هانشتم من ورا الشاشة ولا هانقول كلام نصح حلو ياباشا”.