ميار الببلاوي تكشف أسرارا في قضية وفاء مكي تذاع لأول مرة
كشفت الفنانة ميار الببلاوي أسرارا تذاع لأول مرة في قضية الفنانة وفاء مكي حول تعذيب الخادمتين بعد مرور 23 عاما على تلك الحادثة.
وقالت ميار الببلاوي في تصريحات لبرنامج صبايا الشمس مع الإعلامية ريهام سعيد: “الموضوع تم فتحه حاليا وانا متكلمتش فيه وأنا مريضة قلب ومفيش مرة دخلت عملت عملية وبقيت قبلها أدعي ربنا يمد في عمري لحد مقول كلمة الحق”.
وأضافت: “أنا كنت عاوزة أقول حاجة بس مش عارفة الطريق وجوايا صراع أن كلامي دا هيعمل حاجة ولا لا بقالي 23 سنى تعبانة وبقول يا ترى لو كنت قولت شهادتي كان هيتاخد بكلامي”.
وروت تفاصيل الحكاية قائلة: “لما اتجوزت مكنتش شاطرة ومش بعرف أعمل حاجة في البيت وجوزي كان عاوز يجبلي ناس تساعدني كان معايا بنت بتساعدني مدة طويلة واتجوزت ومشيت وبوابة العمارة قالتلي في واحدة تحت معاها بنتين عاوزين يشتغلوا”.
وتابعت القصة قائلة: “بنت منهم هرشت في شعرها ولقيت شعرها أقرع وقولتلها ايه دا قالتلي دول اللي كانوا عند الأستاذة وفاء مكي والبنت عندها قراع ووفاء حلقتلها شعرها ورفضت أن تعمل البنتان معي ولكنهما كانتا بصحة جيدة لكونهما بدون شعر وخفت منهما أن تعدي ابني”.
وواصلت: “شهادتي اللي بقولها إن البنات جم من عند وفاء مكي مكانوش محروقين ولكن حالقين شعرهم والست مشيت وخدت البنات وتفاجأت بكلام الجرائد بتعذيب البنات ولما شفت صورهم قولت إيه ده دول اللي الست كانت جيباهملي وكلمت صحفي معروف وكان صديق عزيز ليا انا ووفاء وقولته الموضوع دا غلط ووفاء معملتهمش حاجة وهما جم من عند وفاء مكي لعندي ثم راحوا البلد والمصور قالي فيه شخصية عاوزة تؤذي وفاء وكلامك مش هيودي وهيأخر”.
واختتمت: “كل الكلام دا كان من 23 سنة وربنا مد في عمري عشان اقول كدا والحمد الله إني قولت والموضوع دا كان تاعبني”.
