إيناس الدغيدي عن شروط زواجها: عايز راجل ميخرش المية

قالت المخرجة إيناس الدغيدي: “أعشق عالم الرجال أكثر من الستات، ومع الرجالة أشعر بالراحة أكثر من الستات لأن عقلي أقرب لعقل الرجال، وأي حفلة ستات بقولهم متعزمونيش، إزاي أروح حفلة بتاعت ستات ملهاش داعي أتذوق على الفاضي، ولكن أحب يكون الحفل فيه ستات ورجالة”.

عاطفة إيناس الدغيدي
ولفتت خلال لقائها ببرنامج “كلام الناس” المذاع على قناة “mbc مصر”: “دمعتي قريبة جدا، ولما بدأت في السينما أي حد كان بيكلمني كلمة كنت أعيط”.

شروط إيناس الدغيدي للزواج
وأوضحت: “مش هتجوز تاني إلا لما يجيلي راجل ميخرش المية، بعد السن ده علشان أتجوز تاني لازم يكون فيه راجل مدهش.. وأقول إيه ده هو عايش معانا في نفس الكوكب، ومش عايزة راجل أصرف عليه، ويكون حنين وجنتلمان، ويقدر شخصيتي وشغلي، وإذا مجاش ده مش هتجوز، وآخر عرض جواز كان فيه شخصية عايشة في أوروبا، بس حسيت أنى مش هقدر أعيش في أوروبا وأبعد عن بنتي وده كان السنة اللى فاتت”.

وأضافت: “كل العرسان اللى بيجيولي أصغر مني بكتير ودي عاملة لي عقدة لو أصغر مني بسنتين تلاتة، مفيش مشكلة إنما يبقى أصغر مني بـ10 و15 سنة مش هينفع لأن التركيبة هتبقى صعبة إنى أبص لحد أصغر مني، والطلاق بيوجع وأنا اتوجعت من الطلاق، وحاجة مش سهلة، والواحدة بتحس أنها فشلت في الحياة.. ويوم طلاقي اتوجعت”.